చైనాలో రోజువారీ కేసుల సంఖ్య నాటకీయంగా పెరుగుతోంది. మంగళవారం ఒక్కరోజే 5,000కు పైగా కేసులు నమోదయ్యాయి, గత రెండేళ్లలో ఇదే అత్యధికం.

"చైనాలో కోవిడ్-19 మహమ్మారి పరిస్థితి తీవ్రంగా, సంక్లిష్టంగా ఉంది, దీనివల్ల నివారణ, నియంత్రణ మరింత కష్టతరం అవుతున్నాయి," అని జాతీయ ఆరోగ్య కమిషన్ అధికారి ఒకరు అన్నారు.

చైనాలోని 31 ప్రావిన్సులలో, గత వారం నుండి 28 ప్రావిన్సులలో కరోనావైరస్ కేసులు నమోదయ్యాయి.

అయితే, “ప్రభావిత రాష్ట్రాలు, నగరాలు దీనిని క్రమబద్ధంగా, అనుకూలంగా ఎదుర్కొంటున్నాయి; అందువల్ల, మహమ్మారి మొత్తం ఇంకా అదుపులోనే ఉంది” అని ఆ అధికారి అన్నారు.

ఈ నెలలో చైనా ప్రధాన భూభాగంలో 15,000 కరోనావైరస్ కేసులు నమోదయ్యాయని అధికారి తెలిపారు.

"పాజిటివ్ కేసుల సంఖ్య పెరగడంతో, వ్యాధి నివారణ, నియంత్రణ కూడా కష్టతరం అవుతోంది," అని ఆ అధికారి తెలిపారు.

అంతకుముందు, మంగళవారం చైనాలో 5,154 కేసులు నమోదయ్యాయని, వాటిలో 1,647 మంది “లక్షణాలు లేని వాహకులు” ఉన్నారని ఆరోగ్య అధికారులు తెలిపారు.

మహమ్మారి ప్రారంభమై రెండేళ్లలో తొలిసారిగా కేసులు గణనీయంగా పెరిగాయి. కరోనావైరస్‌ను కట్టడి చేయడానికి అధికారులు 77 రోజుల కఠినమైన లాక్‌డౌన్‌ను విధించారు.

ఈశాన్య చైనాలోని జిలిన్ ప్రావిన్స్‌లో 2.1 కోట్ల మందికి పైగా జనాభా ఉంది. తాజా కరోనా ఉధృతి వల్ల ఈ ప్రాంతం తీవ్రంగా దెబ్బతింది, ఒక్కచోటే 4,067 కరోనావైరస్ కేసులు నమోదయ్యాయి. ఈ ప్రాంతాన్ని లాక్‌డౌన్ కింద ఉంచారు.

జిలిన్ "తీవ్రమైన మరియు క్లిష్టమైన పరిస్థితి"ని ఎదుర్కొంటున్నందున, రాష్ట్రవ్యాప్తంగా న్యూక్లియిక్ పరీక్షను ప్రోత్సహించడానికి ప్రభుత్వం "అత్యవసర అసాధారణ చర్యలు" తీసుకుంటుందని ప్రావిన్షియల్ ఆరోగ్య కమిషన్ డిప్యూటీ చీఫ్ జాంగ్ లీ చెప్పినట్లు ప్రభుత్వ ఆధ్వర్యంలోని దినపత్రిక గ్లోబల్ టైమ్స్ నివేదించింది.

చాంగ్‌చున్ మరియు జిలిన్ నగరాల్లో ఇన్ఫెక్షన్ వేగంగా వ్యాపిస్తోంది.

వైరస్ వ్యాప్తిని అరికట్టే చర్యలలో భాగంగా, షాంఘై మరియు షెన్‌జెన్‌తో సహా పలు నగరాలు కఠినమైన లాక్‌డౌన్‌లను విధించాయి, దీంతో స్థానిక మరియు అంతర్జాతీయ తయారీ సంస్థలు తమ వ్యాపారాలను మూసివేయవలసి వచ్చింది.
జిలిన్ ప్రావిన్స్‌లోని అధికారులు కోవిడ్-19 రోగులకు చికిత్స అందించేందుకు చాంగ్‌చున్ మరియు జిలిన్‌లలో 22,880 పడకల సామర్థ్యంతో ఐదు తాత్కాలిక ఆసుపత్రులను నిర్మించారు.

నివేదిక ప్రకారం, కోవిడ్-19ను ఎదుర్కోవడానికి, వైరస్ నిరోధక చర్యలలో సహాయపడటానికి సుమారు 7,000 మంది సైనికులను సమీకరించారు, కాగా 1,200 మంది విశ్రాంత సైనికులు క్వారంటైన్ మరియు పరీక్షా కేంద్రాలలో పనిచేయడానికి స్వచ్ఛందంగా ముందుకు వచ్చారు.

పరీక్షల సామర్థ్యాన్ని పెంచుకోవడానికి, రాష్ట్ర అధికారులు సోమవారం 12 మిలియన్ల యాంటిజెన్ టెస్టింగ్ కిట్లను కొనుగోలు చేశారు.

తాజా వైరస్ వ్యాప్తి సమయంలో విఫలమైనందుకు పలువురు అధికారులను తొలగించారు.